ھىندونېزىيە مېتېئورولوگىيە، كىلىمات ۋە گېئوفىزىكا ئاگېنتلىقى (BMKG)، سۇماترا ئارىلىدا شىددەتلىك كەلكۈن ۋە يەر كۆچۈش سەۋەبىدىن ئادەم ئۆلۈش ئەھۋالى ئېشىۋاتقان بىر پەيتتە، مەملىكەتنىڭ كۆپ قىسىم جايلىرىدا ھۆل-يېغىننىڭ داۋاملىشىدىغانلىقىنى مۆلچەرلىدى.
Kompas TV نىڭ خەۋەر قىلىشىچە، ھىندونېزىيە مېتېئورولوگىيە، كىلىمات ۋە گېئوفىزىكا ئاگېنتلىقىنىڭ مەزكۇر مۆلچەرى، دۈشەنبە كۈنى ھەر قايسى رايونلاردا ھۆل-يېغىننىڭ ئاشقانلىقىنى ۋە بىر قانچە شەھەرنىڭ نورمالسىز ھاۋارايى شارائىتى خەۋپى ئاستىدا ئىكەنلىكىنى بىلدۈرگەندىن كېيىن ئېلان قىلىنغان.
ھىندونېزىيە دۆلەتلىك ئاپەتنى باشقۇرۇش ئاگېنتلىقى يەكشەنبە كۈنى ئېلان قىلغان باياناتىدا، سۇماترا ئارىلىدا داۋاملىشىۋاتقان كەلكۈن ۋە يەر كۆچۈش ۋەقەلىرىدە ئۆلگەنلەر سانىنىڭ 502 گە يەتكەنلىكىنى، 508 كىشىنىڭ بولسا تېخىچە ئىزدىرىكى يوق ئىكەنلىكىنى ئېيتتى.
ئاگېنتلىق، ئاپەتكە ئۇچرىغان رايونلاردا ئىزدەش-قۇتقۇزۇش ئەترەتلىرىنىڭ ئالتە كۈندىن بېرى يوقاپ كەتكەن كىشىلەرنى تېپىش ئۈچۈن خىزمەتلىرىنى داۋاملاشتۇرۇۋاتقانلىقىنى بىلدۈردى.
سانلىق مەلۇماتلار يەنە 646 كىشىنىڭ يارىلانغانلىقىنى، 1 مىليون 100 مىڭ كىشىنىڭ تەسىرگە ئۇچرىغانلىقىنى، يۈزلىگەن ئۆينىڭ ۋەيران بولغانلىقىنى ۋە كەلكۈن سەۋەبىدىن 290 مىڭدىن ئارتۇق كىشىنىڭ ماكانلىرىدىن ئايرىلغانلىقىنى كۆرسەتمەكتە.
تەسىرگە ئۇچرىغان نۇرغۇن رايونلارغا ھازىرغىچە يېتىپ بارغىلى بولمىدى. ئىزدەش ئەترەتلىرى ھەم قۇرۇقلۇقتىن، ھەم ھاۋادىن يوقاپ كەتكەنلەرنى تېپىشقا تىرىماقتا، ئەمما يەر شەكلىدىكى قىيىن شارائىتلار تۈپەيلىدىن ئېغىر تىپلىق ماشىنىلاردىن زۆرۈر ئۈنۈمگە ئېرىشكىلى بولمايۋاتىدۇ.
