ئۇكرائىنانىڭ پايتەختىگە يېرىم كېچىدە باشقۇرۇلىدىغان بومبىلار چۈشتى، ھۇجۇمدا ئىككى كىشى ئۆلدى، كەم دېگەندە بەش كىشى يارىلاندى. رۇسىيە بولسا ھۇجۇمنىڭ ئۇچقۇچىسىز ھاۋا ئاپپاراتى ئىشلەپچىقىرىش زاۋۇتلىرىنى ۋە پورت ئۇل ئەسلىھەلىرىنى نىشان قىلغانلىقىنى ئىلگىرى سۈردى.
ئۇكرائىنا جىددىي ئەھۋاللارغا تاقابىل تۇرۇش ئىدارىسى پەيشەنبە كۈنى ئېلان قىلغان باياناتىدا، رۇسىيەنىڭ كىيېۋدا يېرىم كېچىدە پايتەخت كىيېۋدا ئېلىپ بارغان ھۇجۇملىرىدا ئىككى كىشىنىڭ ئۆلگەنلىكىنى ۋە بىر بالىنىمۇ ئۆز ئىچىگە ئالغان كەم دېگەندە بەش كىشىنىڭ يارىلانغانلىقىنى ئۇقتۇردى.
ئۇكرائىنا ھاۋا ئارمىيەسى نۇرغۇنلىغان باشقۇرۇلىدىغان بومبىلارنىڭ يېقىنلىشىپ قالغانلىقىنى ئەسكەرتىپ ئاگاھلاندۇرۇش بەرگەندىن كېيىن، كىيېۋدىكى فىرانسىيە ئاخبارات ئاگېنتلىقى (AFP) مۇخبىرلىرى ئارقا-ئارقىدىن پارتلاش ئاۋازلىرىنى ئاڭلىغان.
پايتەخت ئاسمىنىدا بىر يۈرۈش يورۇق نۇرلار كۆرۈلگەن ۋە ئارقا-ئارقىدىن پارتلاشلار يۈز بەرگەن. شەھەر باشلىقى ۋىتالى كلىچكو پەيشەنبە كۈنى ئاممىۋى ئورتاقلىشىش تور بېتى Telegram سەھىپىسىدە ئېلان قىلغان باياناتىدا: «دۈشمەن ھۇجۇمى نەتىجىسىدە كىيېۋدا ئىككى كىشى ھاياتىدىن ئايرىلدى» دېدى.
ئۇكرائىنا دۆلەتلىك جىددىي ئەھۋاللارغا تاقابىل تۇرۇش ئىدارىسى ھۇجۇملاردا بەش كىشىنىڭ يارىلانغانلىقىنى ھەمدە سۋىئاتوشىنسكىي ۋە دارنىتسكىي ناھىيەلىرىنىڭ ھۇجۇمغا ئۇچرىغانلىقىنى ئۇقتۇردى.
شەھەر باشلىقى كلىچكو بۇنىڭدىن ئىلگىرى ئاممىۋى ئورتاقلىشىش تور بېتىدىكى سەھىپىسىدە ئېلان قىلغان باياناتىدا، بىر ئىسكىلاتنىڭ نىشان قىلىنغانلىقىنى ۋە «باشقۇرۇلىدىغان بومبا پارچىلىرىنىڭ ئولتۇراق رايون بولمىغان بىنالارنىڭ ئۈستىگە چۈشكەنلىكىنى»، ئۇكرائىنانىڭ شەرقىي شىمالىدىكى ئاساسلىق شەھەر بولغان خاركىۋنىڭمۇ ھەربىي ئۇچقۇچىسىز ھاۋا ئاپپاراتلىرى ھۇجۇمىغا ئۇچرىغانلىقىنى بىلدۈردى.
بۇ ھۇجۇم ياۋروپا ئىتتىپاقى كومىتېتى رەئىسى ئۇرسۇلا فون دېر لېيېننىڭ مۇداپىئە مۇناسىۋەتلىرىنى كۈچەيتىش مەقسىتىدە ئېلىپ بارغان زىيارىتىدىن بىرنەچچە سائەت كېيىن يۈز بەردى.
