ئامېرىكا قوشما ئىشتاتلىرى پىرېزىدېنتى دونالد ترامپ، تېھراننىڭ ۋاشىنگتون بىلەن كېلىشىم ھاسىل قىلىشقا ئىنتىلىۋاتقانلىقىنى ئېيتتى ۋە ئامېرىكانىڭ ئۆلتۈرۈلگەن سابىق ئىران دىنىي رەھبىرى ئەلى ھامانېنىڭ ئىراندا رەسمىي باشلانغان دەپنە مۇراسىملىرى سەۋەبىدىن سۆھبەتلەرنى ۋاقىتلىق توختىتىپ تۇرغانلىقىنى بىلدۈردى.
ترامپ جۈمە كۈنى كەچتە جەنۇبىي داكوتادىكى راشمور تاغلىقىدا، ئامېرىكا مۇستەقىللىقىنىڭ 250-يىللىقىنى قۇتلايدىغان «America 250» پائالىيەتلىرىدە قىلغان سۆزىدە دۆلىتىنىڭ ھەربىي ئۆتمۈشىنى ماختىدى. ترامپ: «دۇنيانىڭ ئەڭ كۈچلۈك ۋە ئەڭ قۇدرەتلىك ئارمىيەسىنى بىز قۇردۇق. ئىككى دۇنيا ئۇرۇشىنى ئۇتۇپ چىقتۇق» دېدى ھەمسە سوغۇق ئۇرۇشنىڭ ئامېرىكانىڭ دۈشمەنلىرىنى «تارىخنىڭ قىرغاقلىرىغا كۆمۈۋەتكەنلىكىنى» ئىلگىرى سۈردى. يېقىنقى مەزگىلدىكى توقۇنۇشلار ئۈستىدىمۇ توختالغان ترامپ: «بىز ۋېنېزۇئېلانى بىر كۈندىلا يەڭدۇق ۋە ئىرانغا ئېغىر زەربە بەردۇق. ئەمدى ئۇلار كېلىشىم تۈزۈشكە ئالدىرىۋاتىدۇ. كېلىشىمنى شۇ دەرىجىدە خالايدۇ. بىزمۇ سىلىق-سىپايە بولغانلىقىمىز ئۈچۈن، دەپنە مۇراسىمى سەۋەبىدىن ئۇلارغا بىر ھەپتە رۇخسەت بەردۇق» دېدى.
«ئەڭ چوڭ تەھدىت»
ترامپ يەنە بۇ مۇھىم خاتىرە يىلىنى كۆككە كۆتۈرۈپ: «250 يىللىق تارىخى بىلەن ئامېرىكا، يەر يۈزىدىكى ئەڭ قەدىمىي جۇمھۇرىيەتتۇر. بىز دۇنيانىڭ ئەڭ ئەركىن خەلقىمىز. دۇنيانىڭ ئەڭ ئادىل ۋە ئەڭ چىداملىق ئاساسىي قانۇنىغا ئىگىمىز» دېگەن ئىبارىلەرنى ئىشلەتتى. ئۇ يەنە: «ياردەم خىزمەتلىرىگە ئامېرىكالىقلاردىن تېخىمۇ كۆپ تۆھپە قوشقان، تېخىمۇ كۆپ ئاچلىقنى ئاخىرلاشتۇرغان، تېخىمۇ كۆپ كېسەلگە چارە تاپقان ياكى ئىنسانىيەتنىڭ تەرەققىياتىغا تېخىمۇ چوڭ تۆھپە قوشقان ھېچكىم يوق» دېگەننى ئىلگىرى سۈردى.
ترامپ: «كوممۇنىزم، ئامېرىكانىڭ ئەركىنلىكىگە قارىتىلغان ئەجەللىك بىر تەھدىتتۇر» دېدى ھەمدە بۇنىڭ «بىرىنچى دۇنيا ئۇرۇشى، ئىككىنچى دۇنيا ئۇرۇشى، پېرل خاربور (Pearl Harbor) ياكى ھەتتا 11-سېنتەبىردىنمۇ تېخىمۇ چوڭ بىر تەھدىت» ئىكەنلىكىنى قەيت قىلدى. ترامپ: «ئامېرىكا ھەرگىز كوممۇنىستىك بىر دۆلەتكە ئايلانمايدۇ» دېدى ۋە ئىچكى سىياسەت ئۈستىدىمۇ توختىلىپ: «بىز ئارىلىق سايلاملارنى پەقەت ئۆزىمىزنىڭ ئۇتتۇرۇپ قويۇشىغا يول قويغان تەقدىردىلا ئۇتتۇرۇپ قويىمىز» دېگەن سۆزلەرنى قىلدى. ئاۋاز بېرىشنى ئۇزارتىش تاكتىكىسىنىڭ ئەمەلدىن قالدۇرۇلۇشى ۋە «شەرتلىك ئامېرىكا قانۇنى» (Save America Act) قوبۇل قىلىنىغان ئەھۋالدا، جۇمھۇرىيەتچىلەرنىڭ «100 يىل بويىچە ھېچقانداق سايلامنى ئۇتتۇرۇپ قويمايدىغانلىقىنى» ئىلگىرى سۈردى.
