تۈركىيە گىرېتسىيەنىڭ غەربىي تىراكيا رايونىغا قاراشلىق رودوپىدىكى قاراجائوغلان كەنتىدىكى تۈرك ئاز سانلىقلىرىنىڭ بىر باشلانغۇچ مەكتىپىگە كىملىكى نامەلۇم كىشىلەر تەرىپىدىن قىلىنغان ھۇجۇمنى ئەيىبلىدى.

تۈركىيە جۇمھۇرىيىتى تاشقى ئىشلار مىنىستىرلىقى باياناتچىسى ئۆنجۈ كەچەلى جۈمە كۈنى ئامېرىكا ئىجتىمائىي تاراتقۇ سۇپىسى «X» تە ئۇچۇر ھەمبەھرىلەپ: «گىرېتسىيەنىڭ غەربىي تىراكيا رايونىدىكى قاراجائوغلان كەنتىگە جايلاشقان، 2021-2022- ئوقۇش يىلىدا گىرېتسىيە دائىرىلىرى تەرىپىدىن تاقىۋېتىلگەن غەربىي تىراكيا تۈرك ئاز سانلىقلىرىغا تەۋە باشلانغۇچ مەكتەپكە كىملىكى نامەلۇم كىشىلەر تەرىپىدىن قىلىنغان ھۇجۇمنى ئەيىبلەيمىز» دېگەنلەرنى قەيت قىلدى.

قاراجائوغلان كەنتىدىكى ھۇجۇم، يەرلىك خەلقنىڭ 4-يانۋاردا زىياننى بايقىشى بىلەن ئوتتۇرىغا چىقتى؛ ئارقىدىن ساقچى تەرەپ تەكشۈرۈش باشلىدى.

كەچەلى گىرېتسىيە دائىرىلىرىدىن ھۇجۇمنىڭ جاۋابكارىنىڭ كىم بولۇشىدىن قەتئىينەزەر، ۋەقەنىڭ ئايدىڭلىتىلىشىنى، جىنايەتچىلەرنىڭ تېز سۈرئەتتە ئېنىقلىنىشىنى ۋە زۆرۈر تەدبىرلەرنىڭ ئېلىنىشىنى كۈتىدىغانلىقىنى تەكىتلەپ: «قاراجائوغلاندا ياشايدىغان قان-قېرىنداشلىرىمىزنىڭ قايغۇسىنى ئورتاقلىشىمىز؛ تۈركىيە بولۇش سۈپىتىمىز بىلەن، غەربىي تىراكيا تۈرك ئاز سانلىقلىرىنىڭ لوزان تىنچلىق شەرتنامىسى ئارقىلىق كاپالەتكە ئىگە قىلىنغان ھەق ۋە مەنپەئەتلىرىنىڭ ئىزچىل قوغدىغۇچىسى بولىدىغانلىقىمىزنى تەكىتلەيمىز» دېدى.

غەربىي تىراكيا تۈرك ئاز سانلىقلار مەسلىھەت كېڭىشىمۇ ئوخشاش بىر ۋەقەنىڭ ئىلگىرىمۇ يۈز بەرگەنلىكىنى ئەسكەرتىپ، ھۇجۇمنى ئەيىبلىدى.