زېلېنىسكىي سۆزىدە: «مەيلى كەسپىي بولسۇن ياكى سەپەرۋەرلىك بىلەن قوبۇل قىلىنغانلار بولسۇن، ئۇرۇشتا قۇربان بولغانلارنىڭ رەسمىي سانى 55 مىڭدۇر» دېدى. ئۇ يەنە، نۇرغۇن كىشىنىڭ ھېلىھەم ئىز-دېرەكسىز يوقالغانلار تىزىملىكىدە ئىكەنلىكىنى ئەسكەرتتى.
ئىستراتېگىيەلىك ۋە خەلقئارالىق تەتقىقاتلار مەركىزى (CSIS) ئېلان قىلغان يېڭى دوكلاتتا بولسا، ئۇرۇشتىكى ئىككى تەرەپنىڭ 2026-يىلى باھارغىچە بولغان جەرياندىكى ئۆلگەن، يارىلانغان ۋە يوقاپ كەتكەنلەر بولۇپ ئومۇمىي تالاپىتىنىڭ ئىككى مىليونغا يېتىشى مۇمكىنلىكى مۆلچەرلەنگەن. دوكلاتقا ئاساسلانغاندا، رۇسىيە قوزغىغان بۇ ئۇرۇشتا تەخمىنەن 1 مىليون 200 مىڭ رۇس ئەسكىرى ۋە 500 مىڭ بىلەن 600 مىڭغا يېقىن ئۇكرائىنا ئەسكىرى تالاپەتكە ئۇچرىغان.
پۇقرالار ۋە ئۇل ئەسلىھەلەرنىڭ ۋەيران بولۇشى
بۇ ئۇرۇش پۇقرالار ئۈچۈنمۇ ئېغىر پاجىئەلەرنى ئېلىپ كەلدى. بىرلەشكەن دۆلەتلەر تەشكىلاتىنىڭ مۆلچەرىچە، 2025-يىلى ئۇكرائىنادا پۇقرالارنىڭ ئۆلۈش نىسبىتى ئۇرۇش باشلانغان بىرىنچى يىلدىكىدىن كېيىنكى ئەڭ يۇقىرى چەككە يەتكەن. ب د ت كىشىلىك ھوقۇق ئورگىنى 2025-يىلىنىڭ ئۆزىدىلا 2500 دىن ئارتۇق پۇقرانىڭ ئۆلگەنلىكىنى، 12 مىڭدىن ئارتۇق ئادەمنىڭ يارىلانغانلىقىنى تىزىمغا ئالغان بولسىمۇ، ئەمەلىي ساننىڭ بۇنىڭدىن خېلىلا يۇقىرى بولۇشى مۇمكىنلىكىنى بىلدۈرمەكتە.
ئۇكرائىنا مىقياسىدا شەھەرلەر خارابىلىككە ئايلىنىپ، ئېنېرگىيە ئۇل ئەسلىھەلىرى ئارقا-ئارقىدىن ۋەيران قىلىندى، مىليونلىغان ئادەم ئۆي-ماكانلىرىنى تاشلاپ قېچىشقا مەجبۇر بولدى. سانائەت ۋە قاتناش سىستېمىسىنىڭ ئېغىر زىيانغا ئۇچرىشى ئۇكرائىنا ئىقتىسادىنىڭ ئەسلىگە كېلىشىگە غايەت زور يۈك بولۇپ قالماقتا.
