سۈرىيە تاراتقۇلىرىغا ئاساسلانغاندا، ئىسرائىلىيە ھەربىي قىسىملىرى شەنبە كۈنى تانكا ۋە بىرونېۋىكلار بىلەن سۈرىيەنىڭ جەنۇبىدىكى قۇنەيترا يېزىلىرىغا كىرىپ، دۆلەتنىڭ ئىگىلىك ھوقۇقىغا دەخلى-تەرۇز قىلغان.
دۆلەت تېلېۋىزىيەسى Al-Ikhbariya TV نىڭ خەۋەر قىلىشىچە، ئىسرائىلىيە كۈچلىرى ئىككى تانكا ۋە ئىككى ھەربىي ئاپتوموبىل بىلەن غەربتىن تال ئەل-ئەخمەر يۆنىلىشىدە شەرققە قاراپ ھەرىكەت قىلىپ، رايوندا ئىسرائىلىيە بايرىقىنى ئاچقان ۋە كېيىنچە چېكىنىپ چىقپ كەتكەن.
مەزكۇر ئاخبارات ئورگىنى، ئالتە ئاپتوموبىللىق بىر ئىسرائىلىيە چارلاش ئەترىتىنىڭ يەنە ئاجام، بارىقا ۋە زۇبەيدانىڭ شەرق ۋە غەربىي قىسىملىرىغا كىرگەنلىكىنى، ئۈچ ھەربىي ئاپتوموبىلدىن تەركىب تاپقان باشقا بىر گۇرۇپپىنىڭ بولسا، ئەين زىۋان ۋە ئەبۇ قۇبەيس يېزىلىرىغا بېسىپ كىرگەنلىكىنى خەۋەر قىلدى.
ئىسرائىلىيە ئارمىيەسى ياكى سۈرىيە دائىرىلىرى بۇ مەسىلىگە مۇناسىۋەتلىك دەرھال بىرەر بايانات ئېلان قىلمىدى.
قۇنەيترادىكى ئىسرائىلىيە ھۇجۇملىرى يېقىندا كەسكىنلەشتى. يەرلىك خەلق، تېرىلغۇ يەرلەرگە زىيان يەتكۈزۈلگەنلىكىدىن، يۈزلىگەن مو ئورمانلىقنىڭ ۋەيران قىلىنغانلىقىدىن، ئاھالىلەرنىڭ تۇتۇپ كېتىلىشىدىن ۋە ھەربىي تەكشۈرۈش پونكىتلىرىنىڭ قۇرۇلۇشىدىن شىكايەت قىلماقتا.
ھۆكۈمەتنىڭ سانلىق مەلۇماتلىرىغا ئاساسلانغاندا، ئىسرائىلىيە ئارمىيەسى 2024-يىلى دېكابىردىن بۇيان سۈرىيەگە 1000 دىن ئارتۇق ھاۋا ھۇجۇمى ئېلىپ بارغان ۋە جەنۇبىي ۋىلايەتلەرگە 400 دىن ئارتۇق چېگرا ھالقىغان ھەربىي ھەرىكەتلەرنى قىلغان.
2024-يىلىنىڭ ئاخىرىدا بەششار ئەسەد رېجىمىنىڭ يىمىرىلىشىدىن كېيىن، ئىسرائىلىيە سۈرىيەنىڭ گولان ئېگىزلىكىدىكى ئىشغالىيىتىنى قورالسىزلاندۇرۇلغان بۇففېر رايونىنى قولغا كىرگۈزۈش ئارقىلىق كېڭەيكەن ئىدى. بۇ قەدەم 1974-يىلدىكى كۈچلەرنى ئايرىش كېلىشىمىنىڭ دەپسەندە قىلىنىشى ھېسابلىنىدۇ.
