ئىسرائىلىيە مۇداپىئە مىنىستىرى ئىسرائىل كاتز قورشاۋ ئاستىدىكى غەززەدە يۈز بەرگەن كەڭ كۆلەملىك ۋەيرانچىلىقنىڭ ئۆزىنى «ياخشى ھېس قىلدۇرغانلىقى»نى ئېيتتى ھەمدە بۇ ئەھۋالغا تەھدىتلەرنى يوقىتىش مەقسىتىدە «قەستەن يولغا قويۇلغان سىياسەت»نىڭ نەتىجىسى دەپ باھا بېرىپ، غەززەنىڭ شىمالىدا دائىمىي يەھۇدىي ئولتۇراق رايونلىرى قۇرۇشنى ئوتتۇرىغا قويدى.

دۈشەنبە كۈنى ئىسرائىلىيەنىڭ «14-قانال» (Channel 14) تېلېۋىزىيەسىدە كۆرسىتىلگەن غەززەنىڭ شىمالىدىكى زىيارەت جەريانىدا بەرگەن باياناتىدا كاتز، رايوندىكى ھەربىي كۈچلەر ئۈچۈن ئۈچ ئولتۇراقلىشىش بازىسى قۇرۇش پىلانىنى ئېلان قىلدى. ئۇ غەززەدىكى ۋەيرانچىلىقنى كۆزىتىش جەريانىدا، قانداق ھېس – تۇيغۇدا بولۇۋاتقانلىقى توغرىسىدىكى سوئالغا «ياخشى بىر تۇيغۇ، شۇنداقمۇ؟» دەپ جاۋاب بەردى.

كاتز ئىسرائىلىيەنىڭ ۋاقىتلىق ۋە تۇيۇقسىز ھۇجۇم قىلىشقا تايىنىدىغان ئىلگىرىكى ئىستراتېگىيەسىدىن ۋاز كەچكەنلىكىنى ئوتتۇرىغا قويۇپ: «ئارمىيە كىرىپ-چىقىپ تۇرۇشنىڭ ئورنىغا ئىچكىرىدە قالىدۇ. تېررورچىلار سىرتتا شۇنداقلا ئۆيلەر ۋەيران قىلىنغان ھالەتتە تۇرىدۇ» دېگەنلەرنى سۆزلىرىگە ئىلاۋە قىلدى.

غەززەدە دائىمىي يەھۇدىي ئولتۇراق رايونى پىلانى

«14-قانال» نىڭ خەۋىرىگە ئاساسلانغاندا، زىيارەتنىڭ ئەڭ دىققەت تارتىدىغان تەرەپلىرىدىن بىرى كاتزنىڭ غەززەنىڭ شىمالىدا دائىمىي يەھۇدىي مەۋجۇتلۇقىنى تۇرغۇزۇش تەكلىپى بولغان.

كاتز ئىسرائىلىيە 2005-يىلى غەززەدىن چېكىنىپ چىقىپ كېتىشتىن ئىلگىرى رايوننىڭ شىمالىدا مەۋجۇت بولغان نۇقتىلاردا ئۈچ دانە «ناھال» (Nahal) ئىلگىرىلەش پونكىتى قۇرۇشنى نىشان قىلغانلىقىنى ئېيتتى. «ناھال» بازىلىرىنىڭ يېڭى ئولتۇراق رايونلارنى قۇرۇش ئۈچۈن ئىشلىتىلىدىغان ھەربىي كۈچلەر بىلەن ئالاقىسى بار بىر گۇرۇپپا ئىكەنلىكى مەلۇم.

مەزكۇر قەدەمنىڭ بىخەتەرلىك سەۋەبلىرى بىلەن زۆرۈر ئىكەنلىكىنى تەكىتلىگەن كاتز، بۇنىڭ ۋاقتى كەلگەندە ئىسرائىلىيەنىڭ كونتروللۇقىنى ۋە ئەتراپتىكى ئاھالىلەرنىڭ مۇداپىئەسىنى كۈچەيتىدىغانلىقىنى ئىلگىرى سۈردى.

ئىسرائىلىيە 2023-يىلى ئۆكتەبىردىن بۇيان قامال ئاستىدىكى رايوندا ئېلىپ بېرىۋاتقان ئىرقىي قىرغىنچىلىقتا كۆپىنچىسى ئاياللار ۋە بالىلار بولۇپ 73 مىڭدىن ئارتۇق پەلەستىنلىكنى ئۆلتۈردى شۇنداقلا 173 مىڭدىن ئارتۇق كىشىنى يارىلاندۇردى. شۇنىڭ بىلەن بىرگە رايوننىڭ زور بىر قىسمىنى خارابىلىككە ئايلاندۇرۇپ پۈتكۈل نوپۇسنى ئۆي-ماكانلىرىدىن سۈرگۈن قىلدى.