ۋېنېزۇئېلا تەرىپىدىن بىرلەشكەن دۆلەتلەر تەشكىلاتىغا ئەۋەتىلگەن خەتكە قارىغاندا، ۋېنېزۇئېلانىڭ بىرلەشكەن دۆلەتلەر تەشكىلاتىدا تۇرۇشلۇق باش ئەلچىسى، خەۋپسىزلىك كېڭىشىدىن ئامېرىكانىڭ ھۇجۇملىرىنى تەكشۈرۈشنى ۋە بۇ ھەرىكەتلەرنىڭ قانۇنسىز دەپ بېكىتىشنى تەلەپ قىلغان.
رېيتېر ئاگېنتلىقى كۆرگەن خەتكە قارىغاندا، ۋېنېزۇئېلا بىرلەشكەن دۆلەتلەر تەشكىلاتى خەۋپسىزلىك كېڭىشىدىن، ئامېرىكانىڭ ۋېنېزۇئېلا دۆلىتىنىڭ دېڭىز قىرغىقىدا ئېلىپ بېرىلغان ھۇجۇملىرىنى قانۇنسىز دەپ بېكىتىشنى ۋە ۋېنېزۇئېلانىڭ ئىگىلىك ھوقۇقىنى قوغداش نىشان قىلىنغان بايانات ئېلان قىلىشنى تەلەپ قىلغان.
ئامېرىكا پىرېزىدېنتى دونالد ترامپ جەنۇبىي كارىب دېڭىزىغا كۆپلەپ قىسىم ئورۇنلاشتۇرۇش توغرىسىدا يوليورۇق چۈشۈرگەن ئىدى. ترامپ ھۆكۈمىتى ئىسپات كۆرسەتمەيلا «زەھەرلىك چېكىملىك ئەتكەسچىلىكىگە چېتىشلىق» دەپ ئەيىبلىگەن پاراخوتلارغا ئامېرىكا ئارمىيەسى كەم دېگەندە بەش قېتىم ھۇجۇم قىلدى.
چارشەنبە كۈنى 15 ئەزادىن تەشكىل تاپقان خەۋپسىزلىك كېڭىشىگە ئەۋەتىلگەن مەكتۇپتا ئەسكەرتىلىشىچە، ۋېنېزۇئېلانىڭ بىرلەشكەن دۆلەتلەر تەشكىلاتىدا تۇرۇشلۇق دائىمىي ۋەكىلى سامۇئېل مونكادا، ۋاشىنگتوننى «خەلقئارا سۇ تەۋەلىكىدىن ئۆتۈۋاتقان پۇقرالار پاراخوتلىرىغا» قىلىنغان ھۇجۇملاردا كەم دېگەندە 27 ئادەمنى ئۆلتۈرۈش بىلەن ئەيىبلىگەن.
مونكادا كېڭەشتىن ھۇجۇملارنى «تەكشۈرۈشنى»، «قانۇنسىز دەپ بېكىتىشنى» ۋە ۋېنېزۇئېلانى ئۆز ئىچىگە ئالغان بارلىق دۆلەتلەرنىڭ «ئىگىلىك ھوقۇقى، سىياسىي مۇستەقىللىقى ۋە زېمىن پۈتۈنلۈكىگە شەرتسىز ھۆرمەت قىلىش» پىرىنسىپىنى يەنە بىر قېتىم تەكىتلەيدىغان بايانات ئېلان قىلىشنى تەلەپ قىلغان.
ئامېرىكانىڭ ۋېتو ھوقۇقى كۈچى
ئامېرىكانىڭ ۋېتو ھوقۇقى بولغاچقا، خەۋپسىزلىك كېڭىشى بۇ مەسىلە ئۈستىدە يىغىن ئۆتكۈزۈشتىن باشقا ھېچقانداق تەدبىر قوللىنالمايدۇ.
كېڭەش ۋېنېزۇئېلا، رۇسىيە ۋە خىتاينىڭ تەلىپى بىلەن ئالدىنقى ھەپتە بۇ جىددىيچىلىكنى مۇزاكىرە قىلىش ئۈچۈن تۇنجى قېتىم يىغىن ئۆتكۈزگەن ئىدى.
يىغىندا ئامېرىكا ھەربىي ھەرىكەتلىرىنىڭ بىرلەشكەن دۆلەتلەر تەشكىلاتى نىزامنامىسىنىڭ 51 – ماددىسىغا ئاساسەن ئېلىپ بېرىلغانلىقىنى ئىلگىرى سۈرگەن ئىدى. بۇ ماددا، ھەرقانداق بىر دۆلەتنىڭ قوراللىق ھۇجۇمغا قارشى ئۆزىنى قوغداش دائىرىسىدە قوللانغان تەدبىرلىرىنى دەرھال خەۋپسىزلىك كېڭىشىگە بىلدۈرۈشىنى بەلگىلەيدۇ.
ئامېرىكانىڭ بىرلەشكەن دۆلەتلەر تەشكىلاتىدا تۇرۇشلۇق باش ئەلچىسى مايك ۋالتز پەيشەنبە كۈنى ئېلان قىلغان باياناتىدا، ترامپنىڭ «ئامېرىكالىقلارنىڭ جېنىغا زامىن بولماقچى بولغان ھەرىكەتلەرگە قارشى، ئامېرىكانىڭ ئىگىلىك ھوقۇقىنى قوغداش ئۈچۈن مىللىي ئىستىخبارات ئىدارىسى، دۆلەت مۇداپىئە مىنىستىرلىقى ۋە دىپلوماتىيەنى» ئىشقا سالىدىغانلىقىنى ئېيتقانلىقىنى ئەسكەرتتى.
ۋالتز «‹Fox News› تېلېۋىزىيە قانىلى» غا بەرگەن باياناتىدا مۇنداق دېدى:
«ۋېنېزۇئېلانىڭ بىرلەشكەن دۆلەتلەر تەشكىلاتىغا خالىغان تەلەپنى قويۇش ھوقۇقى بار. لېكىن بىرلەشكەن دۆلەتلەر تەشكىلاتى نىزامنامىسىنىڭ 51 – ماددىسىمۇ بىرلەشكەن دۆلەتلەر تەشكىلاتىنىڭ بىر پارچىسىدۇر. بۇ ماددا دۆلەتلەرگە ئۆزلىرىنى قوغداش ئىمكانىيىتى يارىتىپ بېرىدۇ. پىرېزىدېنت ترامپنىڭ قىلىۋاتقىنىمۇ، قىلىشنى داۋاملاشتۇرىدىغىنىمۇ دەل مۇشۇ.»
