ئىسرائىلىيە ئارمىيەسى ئىشغال ئاستىدىكى غەربىي قىرغاقتا ئېلىپ بارغان تۇتقۇن قىلىش ھەرىكەتلىرىدە 30 دىن ئارتۇق پەلەستىنلىكنى تۇتۇپ كەتتى ۋە ئونلىغان كىشىنى سائەتلەپ سوراق قىلىش ئۈچۈن تۇتۇپ قالدى.
رەسمىي خەۋەر ئاگېنتلىقى «ۋافا» نىڭ خەۋىرىگە قارىغاندا، يەكشەنبە كۈنى شىمالدىكى نابلىس شەھىرىدە توققۇز كىشى تۇتقۇن قىلىنغان.
تۇتقۇن قىلىنغانلار ئارىسىدا پەلەستىن قانۇن چىقىرىش كېڭىشىنىڭ ئەزاسى جامال تىراۋى ۋە ئۇنىڭ ئىككى ئوغلىمۇ بار بولۇپ، ئىسرائىلىيە كۈچلىرى تۇتقۇن قىلىشتىن بۇرۇن تىراۋىنىڭ بالاتا مۇساپىرلار لاگېرىدىكى ئۆيىگە باستۇرۇپ كىرگەن.
شىمالىي غەربىي قىرغاقتىكى تۇلكارەم شەھىرىدىمۇ بىر پەلەستىنلىك ياش تۇتقۇن قىلىندى.
جەنۇبتىكى خېبرون (خەلىل) شەھىرىدە بولسا ئىسرائىلىيە ئەسكەرلىرى ئۇدا تۆتىنچى كۈنى ئونلىغان ئۆيگە باستۇرۇپ كىرىپ، مال-مۈلۈكلىرىگە زىيان يەتكۈزدى. يەرلىك مەنبەلەر ئانادولۇ ئاگېنتلىقىغا تەخمىنەن 60 پەلەستىنلىكنىڭ سوراق قىلىش ئۈچۈن ئېلىپ كېتىلگەنلىكىنى بىلدۈردى.
ئىسرائىلىيەنىڭ 2023-يىلى ئۆكتەبىردە غەززەگە قاراتقان شىددەتلىك ئۇرۇشىدىن كېيىن، ئىسرائىلىيە ئارمىيەسى ئىشغال ئاستىدىكى غەربىي قىرغاقتىكى ھۇجۇملىرىنى كۈچەيتتى.
ئارمىيەنىڭ ۋە قانۇنسىز كۆچمەنلەرنىڭ ھۇجۇملىرىدا شۇنىڭدىن بۇيان مىڭدىن ئارتۇق پەلەستىنلىك ھاياتىدىن ئايرىلدى. تەخمىنەن 11 مىڭ كىشى يارىلاندى. 20 مىڭدىن ئارتۇق كىشى تۇتقۇن قىلىندى.
«تېررورلۇق ھۇجۇملىرى»
يەنە بىر تەرەپتىن، پەلەستىن تاشقى ئىشلار مىنىستىرلىقى شەنبە كۈنى ئېلان قىلغان باياناتىدا، نابلىس، راماللاھ، بەيتۇللەھىم ۋە خېبروندا پەلەستىنلىكلەرگە قارىتىلغان قانۇنسىز ئىسرائىلىيەلىك كۆچمەنلەرنىڭ زوراۋانلىقىنى «تېررورلۇق ھۇجۇملىرى» دەپ باھالىدى.
مىنىستىرلىق بۇ ھۇجۇملارنىڭ «خەلقىمىزنى ۋەھىمىگە سېلىشقا ۋە ئىشغالىيەتچى ھۆكۈمەت باشچىلىقىدىكى ئىرقىي قىرغىنچىلىق ۋە مەجبۇرىي كۆچۈرۈش پىلانلىرىنى ئاسانلاشتۇرىدىغان بىر مۇھىت يارىتىشقا قارىتىلغان سىستېمىلىق سىياسەتنىڭ بىر قىسمى بولغان خەتەرلىك ۋە داۋاملىشىۋاتقان بىر جىددىيچىلىك» ئىكەنلىكىنى بىلدۈردى.
باياناتتا: «ئىسرائىلىيە ھۆكۈمىتىنىڭ ئەسەبىي سىياسەتلىرى كۆچمەنلەرنى تېخىمۇ كۆپ جىنايەت ئۆتكۈزۈشكە رىغبەتلەندۈرمەكتە ۋە پەلەستىن شەھەرلىرى، يېزىلىرى ۋە لاگېرلىرىدىكى خەلقىمىزگە قارشى تەشكىللىك زوراۋانلىق ۋە تېررورلۇقنى كۈچەيتىۋەتمەكتە» دېيىلدى.
مىنىستىرلىق، پەلەستىن خەلقىنى ئىشغال ئاستىدىكى بارلىق پەلەستىن زېمىنلىرىدا قوغداش ئۈچۈن، بىرلەشكەن دۆلەتلەر تەشكىلاتى خەۋپسىزلىك كېڭىشى تەرىپىدىن خەلقئارالىق قوغداش ۋە تىنچلىق ساقلاش قىسىملىرى قۇرۇلۇشىنى تەلەپ قىلدى ۋە خەلقئارا جەمئىيەتنى بۇ قەبىھ جىنايەتلەرنى سادىر قىلغۇچىلارنىڭ خەلقئارا قانۇنغا ئاساسەن جاۋابكارلىققا تارتىلىشىغا كاپالەتلىك قىلىشقا چاقىردى.
خەلقئارا ئادالەت سوتى، ئۆتكەن ئىيۇل ئېيىدا بەرگەن تارىخىي ھۆكۈمىدە ئىسرائىلىيەنىڭ پەلەستىن زېمىنلىرىنى ئىشغال قىلىۋېلىشىنى قانۇنسىز دەپ ئېلان قىلغان ۋە ئىشغال ئاستىدىكى غەربىي قىرغاق بىلەن شەرقىي قۇددۇستىكى بارلىق ئولتۇراق رايونلارنىڭ (ئىسرائىلىيەلىك كۆچمەنلەر رايونلىرىنىڭ) تارقاقلاشتۇرۇلۇشىنى تەلەپ قىلغان ئىدى.
