گېرمانىيە باش مىنىستىرى فرىدرىخ مېرز ئىسرائىلىيەنىڭ ئاشقۇن ئوڭچىل ئىچكى بىخەتەرلىك ئىشلىرى مىنىستىرى ئىتامار بېن گۋىرنىڭ ئىنسان قېلىپىدىن چىققان ۋە خەلقئارا قانۇنغا خىلاپ چاقىرىقلىرىنى قاتتىق ئەيىبلىدى ۋە بۇلارنى قوبۇل قىلغىلى بولمايدىغانلىقنى بىلدۈردى.
گېرمانىيە ھۆكۈمىتىنىڭ مۇئاۋىن باياناتچىسى سېباستىيان خىللې پايتەخت بېرلىندا ئۆتكۈزۈلگەن ئاخبارات ۋاسىتىلىرىنى خەۋەرلەندۈرۈش يىغىنىدا، ئىسرائىلىيەنىڭ ئاشقۇن ئوڭچىل ئىچكى بىخەتەرلىك ئىشلىرى مىنىستىرى ئىتامار بېن گۋىرنىڭ «غەززەگە ھەر كېچىسى 30-40 قېتىم ھۇجۇم قىلىنىشى كېرەك» دېگەن سۆزلىرى ئۈستىدە توختالدى.
خىللې: «باش مىنىستىر مېرز بېن گۋىرنىڭ ئىنسان قېلىپىدىن چىققان ۋە خەلقئارا قانۇنغا خىلاپ چاقىرىقلىرىنى قاتتىق ئەيىبلەيدۇ. بۇلارنى قوبۇل قىلغىلى بولمايدۇ» دېدى.
ئىسرائىلىيە ھۆكۈمىتىنىڭ ئىيوردان دەرياسىنىڭ غەربىي قىرغىقىدا تاشلىغان ئەڭ يېڭى قەدەملىرىنىڭ باش مىنىستىر مېرز تەرىپىدىن قاتتىق ئەندىشە بىلەن كۆزىتىلىۋاتقانلىقىنى بايان قىلغان خىللې، مېرزنىڭ سىگنالىنى مۇنداق يەتكۈزدى:
«ئىيوردان دەرياسىنىڭ غەربىي قىرغىقىدا باشقا ھېچقانداق بېسىۋېلىش قەدەملىرى تاشلانماسلىقى كېرەك. مەيلى رەسمىي قەدەملەر بولسۇن ياكى تەسىرى بارغانسېرى ئېنىق ھالدا بېسىۋېلىش بىلەن نەتىجىلىنىدىغان سىياسىي، قۇرۇلۇش ياكى باشقا تەدبىرلەر بولسۇن، بۇلارنىڭ ھەممىسى ئىككى دۆلەتلىك ھەل قىلىش پىلانىغا توسالغۇ بولماقتا.»
خىللې يەنە باش مىنىستىر مېرزنىڭ تەلىپىنىڭ ئىشغالىيەتچى ئىسرائىلىيەنىڭ پەلەستىنلىكلەرگە ئىنسانىي مۇئامىلە قىلىشى، مال-مۈلۈكلىرىنى قوغدىشى ھەمدە ئاممىۋى مۇلازىمەت ۋە ئىنسانىي ياردەملەر بىلەن تەمىنلىشى ئىكەنلىكىنىمۇ سۆزلىرىگە ئىلاۋە قىلدى.
