ئۇكرائىنا دۆلەت باشلىقى ۋولودىمىر زېلېنسكىي، ئىتتىپاقداشلىرىنى رۇسىيە نېفىتى سېتىۋېلىشنى توختىتىشقا ۋە جازادىن قېچىش ئۈچۈن «باھانە ئىزدەشنى توختىتىش» قا چاقىردى.
ئامېرىكا پىرېزىدېنتى دونالد ترامپ، ئامېرىكانىڭ پەقەت بارلىق ناتو ئەزالىرى ئوخشاش ئېمبارگو تەدبىرلىرىنى قوبۇل قىلغاندىلا جازا يۈرگۈزىدىغانلىقىنى بىلدۈردى.
زېلېنسكىي، X سۇپىسىدا: «بارلىق شېرىكلىرىمىزنى، جازا يۈرگۈزمەسلىك ئۈچۈن باھانە ئىزدەشنى توختىتىشقا چاقىرىمەن. ياۋروپا، ئامېرىكا، گ7, ۋە گ 20» دەپ يازدى.
ئۇ يەنە: «رۇسىيە نېفىتىنى ئىستېمال قىلىشىنى ئازايتىش كېرەك، بۇ رۇسىيەنىڭ ئۇرۇش قىلىش ئىقتىدارىنى چوقۇم ئاجىزلاشتۇرىدۇ. بىز ئامېرىكانىڭ مەيدانىنى ئاڭلاۋاتىمىز ۋە بۇ مەيداننى، باشقا شېرىكلەرگە ئەمەس، رۇسىيەدىن تەمىنلىنىشنى ئەۋزەل كۆرىدىغان ھەر قانداق كىشى ئاڭلىشى كېرەك» دېدى.
ۋاقىىت ئىنتايىن مۇھىم
يەنە بىر تەرەپتىن، ئۇكرائىنادىكى ئۇرۇش سەۋەبلىك رۇسىيەگە ئېغىر ئېمبارگو يۈرگۈزۈشنى كۆزدە تۇتقان قانۇن لايىھەسىگە باشلامچىلىق قىلغان ئىككى ئامېرىكا پارلامېنت ئەزاسى، شەنبە كۈنىدىكى باياناتىدا، بۇ ھەپتە خىزمەتداشلىرىنى، قانۇن لايىھەسىنى فېدېراتىپ ھۆكۈمەتنىڭ پائالىيىتىنى داۋاملاشتۇرۇشىغا كاپالەتلىك قىلىدىغان «مەجبۇرىي» قانۇنغا قوشۇشقا قايىل قىلىشقا تىرىشىدىغانلىقىنى ئېيتتى.
جۇمھۇرىيەتچىلەر پارتىيەسىدىن كېڭەش پالاتا ئەزاسى لىندسېي گراخام ۋە ئاۋام پالاتا ئەزاسى بىرايان فىتزپاترىك، موسكۋانىڭ ئۇكرائىنا بىلەن تىنچلىق كېلىشىمى سۆھبىتىنى رەت قىلغان ئەھۋالدا، تەدبىرلەرنى يولغا قويىدىغان بىر قانۇن لايىھەسىنى ئايلاردىن بېرى قوللاپ كەلمەكتە. بۇ تەدبىرلەر ئىچىدە، رۇسىيە نېفىتى سېتىۋالغان ھىندىستان ۋە خىتايغا قارىتىلغان ئىككىنچى دەرىجىلىك جازا تەدبىرلىرىمۇ بار. كېڭەش پالاتاسى ۋە ئاۋام پالاتاسى رەھبەرلىرى، پرېزىدېنت دونالد ترامپنىڭ رۇسىيەگە جازا يۈرگۈزۈشكە ئانچە قىزىقماسلىقى سەۋەبلىك، بۇ قانۇن لايىھەسىنى ئاۋازغا قويۇشتىن ئۆزىنى قاچۇردى. ترامپ، بۇنىڭ ئورنىغا، دۇنيادىكى ئىككىنچى چوڭ رۇسىيە نېفىتى سېتىۋالغۇچى بولغان ھىندىستاندىن ئامېرىكاغا كېلىدىغان ماللارغا تاموژنا بېجى قويۇشنى تاللىدى. خىتاي بۇ ساھەدە بىرىنچى ئورۇندا تۇرىدۇ.
داۋاملاشتۇرۇش قارارى ياكى قىسقارتىلىپ CR دەپ ئاتىلىدىغان ۋە چوقۇم تەستىقلىنىشى كېرەك بولغان بۇ خامچوت قانۇنى، قانۇن لايىھەسىگە باشلامچىلىق قىلغانلارغا ئۇنى ماقۇللىتىش پۇرسىتى بېرىشى مۇمكىن.
گراخام ۋە فىتزپاترىك باياناتىدا: «ۋاقىت ئىنتايىن مۇھىم» دەپ كۆرسىتىپ، «بۇ ھەپتە، ھەر ئىككى پارتىيەدىن بولغان خىزمەتداشلىرىمىزنى بۇ قانۇننى ئىلگىرى سۈرۈش ۋە ئەركىنلىك ئۈچۈن زۇلۇمغا قارشى تۇرۇش يولىدا بىزگە قوشۇلۇشقا چاقىرىمىز» دېدى.
قانۇن چىقارغۇچىلار، ترامپنىڭ شەنبە كۈنىدىكى باياناتىدا، ئامېرىكانىڭ رۇسىيەگە يېڭى ئېنېرگىيە ئېمبارگوسى يۈرگۈزۈشكە تەييار ئىكەنلىكىنى، ئەمما پەقەت بارلىق ناتو دۆلەتلىرى رۇسىيە نېفىتى سېتىۋېلىشنى توختىتىپ، ئوخشاش تەدبىرلەرنى يولغا قويغاندىلا بۇنى قىلىدىغانلىقىنى ئېيتقانلىقىنى ماختىدى.
ئۇلار: «بىز جازا ۋە تاموژنا بېجىنىڭ، ئۇكرائىناغا ئىلغار ئامېرىكا قوراللىرىنى سېتىش بىلەن بىرلىكتە، پۇتىننى ئادىل ۋە ئىززەتلىك تىنچلىق ئۈچۈن سۆھبەت ئۈستىلىگە ئولتۇرغۇزۇشنىڭ ئاچقۇچى ئىكەنلىكىگە قەتئىي ئىشىنىمىز» دېگەن سۆزلەرنى قىلدى.
