ب د ت كومىسسارى: غەززەدىكى كىشىلىك ھوقۇق پاجىئەسى پۈتكۈل دۇنيانىڭ كۆزى ئالدىدا داۋاملاشماقتا
بىرلەشكەن دۆلەتلەر تەشكىلاتى (ب د ت) كىشىلىك ھوقۇق ئالىي كومىسسارى ۋولكەر تۈرك، غەززەدىكى كىشىلىك ھوقۇق پاجىئەسىنىڭ پۈتكۈل دۇنيانىڭ كۆزى ئالدىدا داۋاملىشىۋاتقانلىقىنى بىلدۈردى.
ب د ت خەۋپسىزلىك كېڭىشىنىڭ 2025-يىلىنىڭ تۇنجى قېتىملىق جىددىي يىغىنىدا، ئىسرائىلىيەنىڭ غەززەدىكى دوختۇرخانىلارغا قاراتقان ھۇجۇملىرى ۋە ساغلاملىق كىرىزىسى مۇھاكىمە قىلىندى.
يىغىنغا سىن كۆرۈنۈشلۈك ھالەتتە قاتناشقان ب د ت كىشىلىك ھوقۇق ئالىي كومىسسارى تۈرك: «غەززەدىكى كىشىلىك ھوقۇق پاجىئەسى دۇنيانىڭ كۆزى ئالدىدا داۋاملاشماقتا. ئىسرائىلىيەنىڭ ئۇرۇش قوراللىرى ۋە ئۇسۇللىرى مىڭلىغان كىشىنى ئۆلتۈردى ۋە رايوننى ۋەيران قىلدى» دېدى.
تۈرك غەززەدە خەلقئارالىق قانۇننىڭ كۆزگە ئىلىنمىغانلىقىنى ۋە توقۇنۇشلاردا دوختۇرخانىلارنىڭ قوغدىلىشى كېرەكلىكىنى ئەسلىتىپ: «غەززەدىكى دوختۇرخانىلارنىڭ ۋەيران قىلىنىشى پەلەستىنلىكلەرنىڭ يېتەرلىك داۋالىنىش ھوقۇقىنى تارتىۋېلىشتىنمۇ ھالقىدى. بۇ دوختۇرخانىلار بارىدىغان باشقا يېرى يوق مىڭلارچە كىشىنىڭ پاناھگاھى ئىدى» دېدى.
ئۇ سۆزىنى داۋاملاشتۇرۇپ: «سەھىيە ئورۇنلىرىنىڭ قەستەن ۋەيران قىلىنىشى ئومۇمىي جازالاش شەكلىگە ئايلىنىپ، پۇقرالارغا قارىتىلغان كەڭ كۆلەملىك ياكى سىستېمىلىق ھۇجۇمنىڭ بىر قىسمى بولغان ئەھۋالدا ئۇرۇش جىنايىتى شەكىللەندۈرۈشى مۇمكىن، بۇنداق ھەرىكەتلەر ئىنسانىيەتكە قارشى جىنايەتمۇ بولۇپ قېلىشى مۇمكىن» دېگەنلەرنى قەيت قىلدى.
ئۇ، غەززەدىكى دوختۇرخانىلار، ساغلاملىق ئاساسىي قۇرۇلمىسى ۋە مېدىتسىنا خادىملىرىغا قارىتىلغان بارلىق ھۇجۇملارنىڭ «مۇستەقىل، ئومۇميۈزلۈك ۋە ئوچۇق-ئاشكارا» تەكشۈرۈلۈشىنى تەلەپ قىلدى.