ئامېرىكا تاشقى ئىشلار مىنىستىرلىقى گىرېتسىيەگە «Switchblade 300 Block 20» تىپلىق كىچىك تىپتىكى ئۇچقۇچىسىز ھاۋا ئاپپاراتى سېتىپ بېرىلىشىگە رۇخسەت قىلدى.
مىنىستىرلىق تەرىپىدىن گىرېتسىيەگە ھەربىي جابدۇقلارنى سېتىپ بېرىش پىلانى ھەققىدە ئېلان قىلىنغان باياناتتا، گىرېتسىيەگە ئومۇمىي قىممىتى 80 مىليون 100 مىڭ دوللار بولغان «Switchblade 300 Block 20» تىپلىق كىچىك تىپتىكى ئۇچقۇچىسىز ھاۋا ئاپپاراتى ۋە مۇناسىۋەتلىك جابدۇقلارنى سېتىپ بېرىش پىلانىنىڭ تەستىقلانغانلىقى ئەسكەرتىلىپ مۇنداق دېيىلدى:
«(مەزكۇر) سېتىپ بېرىش پىلانى، ياۋروپانىڭ سىياسىي ۋە ئىقتىسادىي مۇقىملىقى ئۈچۈن داۋاملىق كۈچ چىقىرىۋاتقان ناتو ئىتتىپاقدىشىنىڭ بىخەتەرلىكىنى قوغداش تەدبىرلىرىنى كۈچەيتىش ئارقىلىق، ئامېرىكانىڭ تاشقى سىياسىتى ۋە دۆلەت بىخەتەرلىكىنى قوللايدۇ.»
سېتىپ بېرىش پىلانىنىڭ گىرېتسىيەنىڭ نۆۋەتتىكى ۋە كەلگۈسىدىكى تەھدىتلەرنىڭ ئالدىنى ئېلىش، ئىتتىپاقداش كۈچلىرىنىڭ ھەرىكەتلىرىنى قوللاش ۋە ئامېرىكا بىلەن بىرلىكتە مەشغۇلات ئېلىپ بېرىش ئىقتىدارىنى تەرەققىي قىلدۇرىدىغانلىقى قەيت قىلىنغان باياناتتا: «بۇ جابدۇقلار ۋە قوللاشلارنى سېتىپ بېرىشنىڭ رايوندىكى ئاساسىي ھەربىي تەڭپۇڭلۇقنى ئۆزگەرتمەيدىغانلىقى مۆلچەرلەنمەكتە» دېيىلدى.
