ھېندونېزىيەدىكى يەر كۆچۈش ئاپىتىدە قازا قىلغانلارنىڭ سانى ئاز دېگەندە 64 كە يەتتى
شىددەتلىك يامغۇر نەچچە ئونلىغان ئۆينىڭ توپا ئاستىدا قېلىشىغا ۋە ئاز دېگەندە 64 كىشىنىڭ ئۆلۈشىگە سەۋەب بولغان يەر كۆچۈش ۋەقەسىنى كەلتۈرۈپ چىقاردى. رايوننىڭ جۇغراپىيەلىك شارائىتىنىڭ قىيىنلىقى داۋاملىشىۋاتقان قۇتقۇزۇش خىزمەتلىرىنى قىيىنلاشتۇرماقتا.
ئۆتكەن ھەپتە ھېندونېزىيەدە يۈز بەرگەن يەر كۆچۈش ۋەقەسىدە قازا قىلغانلارنىڭ سانى 64 كە يەتتى. غەربىي جاۋادا 16 كىشى يوقاپ كەتتى. رايوندا ئىزدەش-قۇتقۇزۇش خىزمەتلىرى سەككىزىنچى كۈنىگە قەدەم قويدى.
بانجۇڭ ئىزدەش-قۇتقۇزۇش ئىدارىسىنىڭ باشلىقى ئادې دىئان پېرمانانىڭ بىلدۈرۈشىچە، شەنبە كۈنى رايوندىن يەنە تۆت كىشىنىڭ جەسىتى چىقىرىلغان بولۇپ، جەزملەشتۈرۈلگەن ئۆلۈم سانى 64 كە يەتكەن. يەنە تەخمىنەن يوقاپ كەتكەن 16 كىشىنى ئىزدەپ تېپىش خىزمەتلىرى داۋاملاشماقتا.
ئۇ يەنە ئىزدەش خىزمىتىنىڭ سەككىزىنچى كۈنىدە ئاپشاركىلار ۋە ئېغىر تىپتىكى ئۈسكۈنىلەرنى ئىشلىتىش ئارقىلىق داۋاملىشىۋاتقانلىقىنى، تەخمىنەن 3675 خادىمنىڭ ۋەزىپە ئۆتەۋاتقانلىقىنى سۆزلىرىگە ئىلاۋە قىلدى.
ھازىرغىچە 49 جەسەتنىڭ كىملىكى ئېنىقلىنىپ ئائىلە ئەزالىرىغا تاپشۇرۇپ بېرىلدى، 75 كىشى بىخەتەر قۇتقۇزۇۋېلىندى.
لاي ۋە توپا ئاستىدا قالغان ئۆيلەر
دېڭىز ئارمىيەسى سەيشەنبە كۈنى چېگرا چارلاش مەشىقى قىلىۋاتقان يىگىرمە ئۈچ ئەسكەرنىڭمۇ قازا قىلغانلىقىنى خەۋەر قىلدى.
24-يانۋار كۈنى بانجۇڭ باراتتىكى پاسىر لانگۇ يېزىسىدا يۈز بەرگەن يەر كۆچۈش ۋەقەسى شىددەتلىك يامغۇر سەۋەبىدىن كېلىپ چىقتى.
نەچچە ئونلىغان ئۆي لاي ۋە توپا ئاستىدا قالدى. بۇ يەر كۆچۈش ۋەقەسى، ئۆتكەن يىلنىڭ ئاخىرلىرىدا سۇماترا ئارىلىدا سىكلون (قۇيۇن) مەنبەلىك سۇ بېسىش ۋە يەر كۆچۈش ۋەقەلىرىدىن كېيىن يۈز بەرگەن ئىدى. ئۇ ۋەقەلەردە 1200 كىشى ھاياتىدىن ئايرىلغان ۋە بىر مىليوندىن ئارتۇق كىشى ئۆي-ماكانسىز قالغان ئىدى.
ئىزدەش-قۇتقۇزۇش ئىدارىسى Basarnas جىددىي تاقابىل تۇرۇش خىزمەت ۋاقتىنى 6-فېۋرالغىچە يەنە يەتتە كۈن ئۇزارتتى. ئاپەتكە ئۇچرىغان ۋە قىيىن جۇغراپىيەلىك شارائىتقا ئىگە رايونلاردا ئىزدەش-قۇتقۇزۇش خىزمەتلىرى داۋاملاشماقتا.
پارلامېنتنىڭ بىر ھەيئىتى چارشەنبە كۈنى Basarnas نىڭ مەبلىغىنى قىسقارتقان بولۇپ، بۇ قارار ئىدارە دۇچ كەلگەن ئاپەت سانىنىڭ كۆپلۈكىگە قارىتا ئەندىشىلەر بولۇشىغا قارىماي ماقۇللانغان ئىدى.