ئامېرىكا كۇۋەيتتە جېنىدىن ئايرىلغان ئىككى ئەسكەرنىڭ كىملىكىنى ئېلان قىلدى

پېنتاگون چارشەنبە (2026-يىلى 4-مارت) كۈنى ئىران بىلەن بولغان ئۇرۇش جەريانىدا جېنىدىن ئايرىلغان ئىككى ئامېرىكا ئەسكىرىنىڭ كىملىكىنى ئېلان قىلدى.

مەزكۇر قۇرۇقلۇق ئارمىيە زاپاس ئەسكەرلىرى يەكشەنبە (2026-يىلى 1-مارت) كۈنى ئىران ئۇچقۇسى كۇۋەيتنىڭ شۇئەيبا پورتىدىكى ئامېرىكا ھەربىي مەركىزىگە زەربە بەرگەندە جېنىدىن ئايرىلغان بولۇپ، بۇ ھۇجۇمدا يەنە باشقا تۆت زاپاس ئەسكەرمۇ جېنىدىن ئايرىلغان ئىدى.

پېنتاگون شەنبە (2026-يىلى 28-فېۋرال) كۈنى ئىران ئۇچقۇسى شۇئەيبا پورتىغا زەربە بەرگەندە جېنىدىن ئايرىلغان ئالتە نەپەر ئامېرىكا ئەسكىرىنىڭ ئىچىدە، ئايوۋا ئىشتاتىنىڭ ئىندىيانولا شەھىرىدىن كەلگەن 45 ياشلىق جېفرېي ئوبرايېن (Jeffrey R. O’Brien) ۋە كالىفورنىيە ئىشتاتىنىڭ ساكرامېنتو شەھىرىدىن كەلگەن 54 ياشلىق روبېرت مارزان (Robert M. Marzan) نىڭ بارلىقىنى بىلدۈردى.

پېنتاگون مارزاننىڭ ھۇجۇمدا جېنىدىن ئايرىلغانلىقىغا ئىشىنىدىغانلىقىنى، جەسەت تەكشۈرۈش خادىملىرىنىڭ ئۇنىڭ كىملىكىنى رەسمىي دەلىللەش خىزمىتىنى پات ئارىدا تاماملايدىغانلىقىنى قوشۇمچە قىلدى.

پېنتاگون بۇنىڭدىن ئىلگىرى جېنىدىن ئايرىلغان باشقا تۆت ئەسكەرنىڭ كىملىكىنى تۆۋەندىكىدەك ئاشكارىلىغان ئىدى:

فىلورىدا ئىشتاتىنىڭ ۋىنتېر خاۋېن شەھىرىدىن كودى خورك  (Cody A. Khork) 35 ياش؛ نېبراسكا ئىشتاتىنىڭ بېللېۋۇ شەھىرىدىن نوئا تىتژېنس (Noah L. Tietjens) 42 ياش؛ مىننېسوتا ئىشتاتىنىڭ ۋايت بېئېر لېيك شەھىرىدىن نىكول ئامور (Nicole M. Amor)  39 ياش ۋە ئايوۋا ئىشتاتىنىڭ غەربىي دېس موينېس شەھىرىدىن دېكلان كوئادى (Declan J. Coady)  20 ياش.

كۇۋەيتتىكى بىر سودا مەركىزى بولغان شۇئەيبا پورتى يەنە ئامېرىكا ئارمىيەسىنىڭ مۇھىم قاتناش-تىرانسىپورت مەركىزىي سۈپىتىدە ئىشلىتىلىدىغان بولۇپ، رايون خاراكتېرلىك تاكتىكىلىق ئاپتوموبىللار ۋە تەمىنات ئەشيالىرى توشۇلىدۇ.

ھۇجۇمدا جېنىدىن ئايرىلغانلاردىن سىرت، 18 ئەسكەرمۇ يارىلانغان ئىدى.

ئۇچقۇ ھۇجۇمى ئامېرىكا بىلەن ئىسرائىلىيەنىڭ شەنبە (28-فېۋرال) كۈنى ئىرانغا قىلغان بىرلەشمە ھۇجۇمىدىن كېيىنلا يۈز بەرگەن ئىدى. ئامېرىكا-ئىسىرائىلىيە ھۇجۇمىدا، ئىراننىڭ ئالىي رەھبىرى ئەلى ھامېنېينى ئۆز ئىچىگە ئالغان بىر قانچە يۇقىرى دەرىجىلىك ئەمەلدارلار ئۆلتۈرۈلگەن ئىدى.

شۇنىڭدىن كېيىن، ئىران پۈتكۈل رايون بويىچە پارس قولتۇقى ئەللىرى ۋە ئامېرىكا ھەربىي بازىلىرىنى نىشان قىلغان ھۇجۇملار بىلەن ئۆچ ئېلىشقا ئۆتكەن ئىدى.