جۇمھۇر رەئىس رەجەپ تاييىپ ئەردوغان پايتەخت ئەنقەرەدە ئۆتكۈزۈلگەن 2-نۆۋەتلىك ئۇچۇر-ئالاقە كېڭىشى يىغىنىنىڭ بىرىنچى كۈنىدە ئىشتىراكچىلارغا خىتاب قىلدى.
سۆزىنى «ئالدى بىلەن ئىسرائىلىيە تەرىپىدىن غەززەدە شېھىت قىلىنغانلارنى ئۆز ئىچىگە ئالغان، غايىۋى ۋە پىداكارلىق بىلەن ئېلىپ بارغان خىزمەتلىرى جەريانىدا ھاياتىدىن ئايرىلغان تاراتقۇ خادىملىرىنى مىننەتدارلىق بىلەن ياد ئېتىمەن» دەپ باشلىغان جۇمھۇر رەئىس ئەردوغان، بۈگۈنكى كۈندە ئۇچۇرغا ئېرىشىش ئىلگىرىكى ھەرقانداق چاغدىكىدىن تېزلاشقان، ئاسانلاشقان ۋە ئومۇملاشقان بىر ھەرىكەتچان دەۋرنى باشتىن كەچۈرۈۋاتقانلىقىمىزنى تەكىتلەپ مۇنداق دېدى:
«سۈنئىي ھەمراھ ۋە ئالاقە تېخنىكىلىرىدا سېكۇنت-مىنۇت بويىچە يېڭى بىر تەرەققىيات، يېڭى بىر ئىلگىرىلەش ئوتتۇرىغا چىقماقتا. دۇنيانىڭ بىر چېتىدە يۈز بەرگەن ھەرقانداق بىر ۋەقە مىنۇتلار، ھەتتا سېكۇنتلار ئىچىدە مىلياردلىغان كىشىگە يېتىپ بارماقتا. ئىلگىرى بىزنىڭ سائەتلىرىمىزنى، كۈنلىرىمىزنى ۋە ھەپتىلىرىمىزنى ئالىدىغان ئىشلار، ئەمدىلىكتە پەقەت مىنۇتلار ئىچىدىلا بىرلا كۇنۇپكا ياكى بۇيرۇق بىلەن ھەل بولماقتا.»
بولۇپمۇ سۈنئىي ئەقىل مودېللىرىنىڭ ئىشقا كىرىشتۈرۈلۈشى بىلەن مائارىپتىن تاراتقۇغىچە، قاتناشتىن سودىغىچە، سەھىيەدىن يېزا ئىگىلىكىگىچە ھەر بىر ساھەدە بۇ تېخنىكىلار تەمىنلىگەن ئەۋزەللىكلەردىن پايدىلىنىلىۋاتقانلىقىنى تەكىتلىگەن ئەردوغان مۇنداق دېدى:
«كەڭ خەلق ئاممىسى <ئالگورىتمىلىق فاشىزم> دەپ ئاتىلىدىغان بىر تۇزاققا چۈشۈرۈلۈشكە ئۇرۇنۇلماقتا. بۇ جەرياندا ئەڭ كۆپ زىيانغا ئۇچراۋاتقان ئۇقۇم بولسا شەك-شۈبھىسىزكى <ھەقىقەت> تۇر. ھالباكى، ئۇچۇر-ئالاقىنىڭ تۈپ نىشانى؛ توغرا ۋە ئىشەنچلىك ئۇچۇرنى ئالاقىدار كىشىگە ئەڭ قىسقا يول بىلەن ۋە ئەڭ تېز سۈرئەتتە يەتكۈزۈشتۇر.
ئاممىۋى دىپلوماتىيەدىن سۈنئىي ئەقىلغىچە، يالغان ئۇچۇرلارغا قارشى كۈرەشتىن ئاپەت ۋە كىرىزىس ئۇچۇر-ئالاقىسىگىچە، خەۋەر ئىشلەش، ئۇچۇر-ئالاقە قانۇنى ۋە رەقەملىك سۇپىلارغا ئوخشىغان ئۇچۇر-ئالاقە ساھەسىدىكى تارماق تېمىلارنىڭ ھەممىسى مۇھاکىمە قىلىنىدىغان بۇ يىغىنلارنى ناھايىتى قىممەتلىك دەپ قارايدىغانلىقىمنى بۇ يەردە تەكىتلەپ ئۆتمەكچىمەن.
كېڭەشنىڭ مەيلى مول مەزمۇنلۇق ئىشتىراكچىلار قۇرۇلمىسى جەھەتتىن بولسۇن، مەيلى كۈچلۈك مەزمۇنى جەھەتتىن بولسۇن، بىز كەمچىللىكىنى كۆپ ھېس قىلىۋاتقان بىر ساھەدىكى مۇھىم بىر بوشلۇقنى تولدۇرىدىغانلىقىغا چىن دىلىمدىن ئىشىنىمەن. ئورتاق ئەقىلنىڭ مەھسۇلى بولغان بۇ يەردىكى بايقاشلار، دوكلاتلار، ماقالىلەر ۋە ئەتە ئېلان قىلىنىدىغان نەتىجە خىتابنامىسىنىڭ، تۈركىيەنىڭ كەلگۈسى تەسەۋۋۇرىنى شەكىللەندۈرىدىغانلىقىنى؛ دۆلىتىمىزنىڭ دۆلەت ئىچى ۋە خەلقئارادىكى ئۇچۇر-ئالاقە ئىقتىدارىنى خۇدا خالىسا تېخىمۇ كۈچەيتىدىغانلىقىنى ئۈمىد قىلىمەن.»
