ياۋروپا ئىتتىپاقىنىڭ تاشقى مۇناسىۋەتلەر ۋە بىخەتەرلىك سىياسىتى ئالىي ۋەكىلى كاژا كاللاس (Kaja Kallas) رۇسىيەگە قاراتقان يېڭى بىر يۈرۈش ئېمبارگو پىلانىنى ئېلان قىلدى. بۇ پىلان موسكۋانىڭ ئۇكرائىنادىكى ئۇرۇشنى مەبلەغ بىلەن تەمىنلەش ئىقتىدارىنى تېخىمۇ ئاجىزلىتىشنى مەقسەت قىلغان بولۇپ، بانكىلار، قورال-ياراغ ئىشلەپچىقارغۇچىلار، نېفىت سودىگەرلىرى، نېفىت پىششىقلاپ ئىشلەش زاۋۇتلىرى ۋە ئۈچىنچى دۆلەتلەردىكى كرىپتو تىجارەتچىلىرىنى نىشان قىلىدۇ.

كاللاس سەيشەنبە كۈنى ئېكس (X) سۇپىسىدا يېڭى تەدبىرلەرنى ئېلان قىلىپ: «بىز قەدەممۇ قەدەم رۇسىيەنىڭ ئۇرۇش ئىقتىسادىنىڭ ئۇلىنى يىقىتىۋاتىمىز» دېدى.

ئۇنىڭ ئېيتىشىچە، ئوتتۇرىغا قويۇلغان بۇ پىلان رۇسىيە نېفىت باھاسىنىڭ يۇقىرى چېكىنى تەڭشەش مېخانىزمىنى ۋاقىتلىق توختىتىشنى ۋە موسكۋانىڭ كىرىم قىلىش ياكى مەۋجۇت ئېمبارگولارنى ئايلىنىپ ئۆتۈش ئۈچۈن پايدىلىنىدىغان ئورگانلىرىغا يېڭى جازا تەدبىرلىرىنى قوللىنىشنى ئۆز ئىچىگە ئالىدۇ.

ياۋروپا كومىتېتىنىڭ رەئىسى ئۇرسۇلا فوندېر لېيېن (Ursula von der Leyen) بىرۇسسېلدىكى مەتبۇئات يىغىنىدا سۆز قىلىپ، بۇ تەدبىرلەرنىڭ ئېنېرگىيە، پۇل-مۇئامىلە ئىشلىرى، كرىپتو پۇل بىرلىكلىرى ۋە بېلىقچىلىققا مەركەزلىشىدىغانلىقىنى، شۇنداقلا سابىق رۇسىيە جەڭچىلىرىنىڭ ياۋروپا ئىتتىپاقىغا كىرىشىنى مەنئى قىلىدىغانلىقىنى ئېيتتى.

فوندېر لېيېن رۇسىيە ئىقتىسادىنىڭ ئاستىلاۋاتقانلىقىنى ۋە خامچوت بېسىمىنىڭ كۈچىيىۋاتقانلىقىنى ئىلگىرى سۈرۈپ: «بىزنىڭ ئېمبارگولىرىمىز ئۈنۈم بېرىۋاتىدۇ. ئۇلار رۇسىيەنىڭ ئۇرۇش تىرىشچانلىقىنىڭ ئىقتىسادىي ئاساسىنى ئاجىزلاشتۇرۇۋاتىدۇ» دېدى.

مۇناسىۋەتلىك ئۇچۇرلارTRT World - EU sanctions push stalls as bloc fractures over Russia

ئېمبارگو دېڭىز تىرانسىپورتىغا زەربە بەردى

ئېنېرگىيەگە مۇناسىۋەتلىك تەدبىرلەر ئاستىدا، ياۋروپا ئىتتىپاقى ئوتتۇرا شەرق ۋە بھورمۇز بوغۇزىدىكى جىددىي ۋەزىيەت سەۋەبىدىن نېفىت باھاسىنىڭ يۇقىرى چېكىنى تەڭشەشنى كېلەر يىلى  (2027) 1-ئايغىچە كېچىكتۈرۈشنى ئوتتۇرىغا قويدى.

بۇ پىلان يەنە 30 پاراخوتنى ياۋروپا ئىتتىپاقىنىڭ جازا تىزىملىكىگە كىرگۈزىدۇ، بۇنىڭ بىلەن رۇسىيەنىڭ «كۆلەڭگە پاراخوت ئەترىتى » (shadow fleet) دەپ ئاتالغان پاراخوتلىرىنىڭ ئومۇمىي سانى 630 دىن ئاشىدۇ.

ياۋروپا ئىتتىپاقى تۇنجى قېتىم كۆلەڭگە پاراخوتلىرىغا يېقىلغۇ قاچىلاش قاتارلىق مۇلازىمەتلەر بىلەن تەمىنلەيدىغان پاراخوتلارنى، شۇنداقلا رۇسىيە نېفىت سودىسى، نېفىت پىششىقلاپ ئىشلەش ياكى توشۇشقا قاتناشقان پورتلار، ئايرودۇرۇملار ۋە نېفىت زاۋۇتلىرى قاتارلىق مۇھىم ئۇل- ئەسلىھەلەرنىمۇ ئېمبارگو تىزىملىكىگە كىرگۈزۈشنى پىلانلىدى.

ياۋروپا كومىتېتى يەنە رۇسىيەگە سۇيۇقلاندۇرۇلغان تەبىئىي گاز (LNG) توشۇش پاراخوتلىرىنى سېتىشنى چەكلەشنى ئوتتۇرىغا قويدى.

مۇناسىۋەتلىك ئۇچۇرلارTRT World - Hungary urges EU to lift sanctions on Russian energy as Mideast war rages on

بانكىلار ۋە كرىپتو پۇللار نىشانغا ئېلىندى

مالىيە جەھەتتە، بىريۇسسېل يەنە 31 رۇسىيە بانكاسى بىلەن بولغان سودىنى چەكلەشنى، شۇنداقلا رۇسىيەنىڭ ئېمبارگولارنى ئايلىنىپ ئۆتۈشىگە ياردەم بەرگەن 20 چەت ئەل بانكاسى، كرىپتو شىركىتى ۋە نېفىت سودىگەرلىرىگە جازا يۈرگۈزۈشنى پىلانلىماقتا.

فوندېر لېيېننىڭ ئېيتىشىچە، بۇ پىلان تۇنجى قېتىم رۇسىيەنىڭ جازادىن قېچىشىغا ياردەم بەرگەن ئۈچىنچى دۆلەتلەرنىڭ كرىپتو پۇل مۇلازىمىتىنى تولۇق چەكلەش مۇمكىنچىلىكىنى ئوتتۇرىغا قويىدۇ.

ئوتتۇرىغا قويۇلغان تەدبىرلەر يەنە رۇسىيەنىڭ ھەربىي-سانائەت ساھەسىدە ئىشلىتىلىدىغان تېخنىكا ۋە ماتېرىياللارغا، جۇملىدىن ئالەم قاتنىشى، مۇداپىئە ۋە ئۇچقۇ ياساشتا ئىشلىتىلىدىغان مېتاللار، قېتىشمىلار، شۇنداقلا يەر يۈزىدىن قوللاش ۋە قويۇپ بېرىش سىستېمىلىرىغا يېڭى ئېكسپورت چەكلىمىسى قويۇشنى ئۆز ئىچىگە ئالىدۇ.

ياۋروپا ئىتتىپاقى يەنە تەخمىنەن 60 مىليون ياۋرو (69 مىليون دوللار) قىممىتىدىكى ماللارنى، جۈملىدىن بەزى مېتاللار، مېتال رۇدىلىرى ۋە ئاپتوموبىل زاپچاسلىرىنى ئىمپورت قىلىشنى چەكلەشنى پىلانلىماقتا.

بۇنىڭدىن باشقا، بىرۇسسېل رۇسىيەنىڭ بېلىق مەھسۇلاتلىرىغا، جۈملىدىن بىر قىسىم كود(cod) بېلىقى مەھسۇلاتلىرىنى پۈتۈنلەي چەكلەشنى ئوتتۇرىغا قويدى. شۇنىڭ بىلەن بىر ۋاقىتتا، بېلارۇسىيەنىڭ رۇسىيە ماللىرى ئۈچۈن ئايلانما يول بولۇپ قېلىشىنىڭ ئالدىنى ئېلىش ئۈچۈن، بېلارۇسىيەگە قويۇلغان سودا چەكلىمىلىرىنى رۇسىيەگە قويۇلغان چەكلىمىلەر بىلەن ئوخشاش سەۋىيەگە كەلتۈرىدۇ.

بۇ جازا پىلانى كۈچكە ئىگە بولۇشتىن ئىلگىرى، ياۋروپا ئىتتىپاقىغا ئەزا بارلىق دۆلەتلەرنىڭ بىردەك ماقۇللۇقىدىن ئۆتۈشى كېرەك.

مۇناسىۋەتلىك ئۇچۇرلارTRT World - US imposes Ukraine-related sanctions on Russian oil companies Rosneft, Lukoil