ئۇكرائىنا پىرېزىدېنتى ۋولۇدىمىر زېلېنىسكىي ئۇكرائىنا ئەمەلدارلىرى بىلەن ئامېرىكا پىرېزىدېنتى دونالد ترامپنىڭ ۋەكىللىرى ئوتتۇرىسىدا ئېلىپ بېرىلغان يۇقىرى دەرىجىلىك سۆھبەتلەردىن كېيىن، كىيېۋنىڭ رۇسىيە بىلەن بولغان ئۇرۇشنى ئاخىرلاشتۇرۇش ئۈچۈن ئامېرىكا بىلەن بىرلىكتە بىر «ئاخىرقى كېلىشىم» لايىھەسى ئۈستىدە ئىشلەۋاتقانلىقىنى تىلغا ئېلىپ: «بىز ئامېرىكانىڭ ئاخىرقى كېلىشىمنى ئىمزالاشنى خالايدىغانلىقىنى ھېس قىلىۋاتىمىز ۋە بىز بۇنىڭغا تولۇق ھەمكارلىشىمىز. ئۇكرائىنا ھېچقانداق ۋاقىتتا ۋە ھەرگىزمۇ تىنچلىققا توسالغۇ بولۇپ باقمىدى» دېدى.
پىرېزىدېنت ۋولۇدىمىر زېلېنىسكىي رۇستەم ئومەروف ۋە ئاندرىي ھىناتوۋ قاتارلىقلارمۇ ئورۇن ئالغان سۆھبەت ئۆمىكىنىڭ سۆھبەتلەردىن تېخىمۇ پىشىپ يېتىلگەن لايىھەلەر بىلەن قايتقانلىقىنى سۆزلىرىگە ئىلاۋە قىلدى.
ئۇ ئۇكرائىنا دىپلوماتىيە يولىنى داۋاملاشتۇرۇۋاتقان بىر پەيتتە، خەلقئارا جەمئىيەتنىڭ دۆلەتنىڭ ئېنېرگىيە ساھەسىگە قارىتىلغان رۇسىيە ھۇجۇملىرىغا قارشى ھاۋا مۇداپىئە باشقۇرۇلىدىغان بومبىلىرى ۋە قورال-ياراغ مەبلىغى بىلەن تەمىنلەشنى داۋاملاشتۇرۇشى كېرەكلىكىنى تەكىتلىدى.
ئۇ يەنە كېلەر ئىككى يىل ئۈچۈن يېقىندا تەستىقلانغان 90 مىليارد دوللارلىق ياردەم پىلانى توغرىسىدا ئۇرسۇلا فون دېر لېيېن بىلەن كۆرۈشكەنلىكىنى دەلىللىدى ۋە بۇ ئىقتىسادىي ياردەمنى ئۇكرائىنانىڭ دۆلەت مۇقىملىقى ئۈچۈن «تارىخىي بىر قارار» دەپ باھالىدى.
ئۇكرائىنانىڭ ترامپ ھۆكۈمىتى بىلەن بولغان ئالاقىلىرى، كىيېۋنىڭ ئامېرىكا تاشقى سىياسىتىدە يۈز بېرىشى مۇمكىن بولغان بىر ئۆزگىرىشتىن ئىلگىرى، ئۆزىنىڭ گېئو-سىياسىي ئورنىنى كاپالەتكە ئىگە قىلىش تىرىشچانلىقلىرى بىلەن ماس كەلمەكتە.
ھۆكۈمەت كەلگۈسىدىكى سۆھبەتلەردە سۆز قىلىش كۈچىنى ساقلاپ قېلىش ئۈچۈن، ياۋروپا ئىتتىپاقىدىن ئۇزۇن مۇددەتلىك مالىيە ۋەدىلىرىگە ئېرىشىشكە ۋە غەربلىك شېرىكلىرىدىن ھەربىي ئەسلىھەلەر بىلەن تەمىنلەشكە كۆڭۈل بۆلمەكتە.
