غەززە سەھىيە مىنىستىرلىقى شەنبە كۈنى بايانات ئېلان قىلىپ، مۇھاسىرىدىكى بۇ رايوندا ئۆتكەن ئىيۇل ئېيىدا 152 پەلەستىنلىكنىڭ ھاياتىدىن ئايرىلغانلىقىنى، بۇنىڭ يىل بېشىدىن بۇيانقى ئەڭ يۇقىرى ئايلىق ئۆلۈم نىسبىتى رېكورتى ئىكەنلىكىنى بىلدۈردى.
مىنىستىرلىق باياناتىدا سەھىيە ئوچۇر مەركىزىنىڭ ئامبارلىرىدىن ئېلىنغان ئۇچۇرلارغا ئاساسلىنىپ، ئۆتكەن ئايدا غەززە بويىچە قازا قىلغۇچىلار سانىدا كەسكىن ئېشىش كۆرۈلگەنلىكىنى ۋە ئوخشىمىغان ۋىلايەتلەردە جەمئىي 152 كىشىنىڭ ئۆلتۈرۈلگەنلىكىنى بىلدۈردى.
قازا قىلغانلار ئاراسىدا 21 نەپەر كىچىك بالا، 14 ئايال ۋە 4 ياشانغان كىشى بار بولۇپ، مىنىستىرلىق بۇ ساننىڭ توختاۋسىز كۈچىيىۋاتقان توقۇنۇشلارنىڭ پۇقرالار ۋە ئادەم زىچ ئولتۇراقلاشقان رايونلارغا يەتكۈزۈۋاتقان بىۋاسىتە زىيىنىنى ئەكس ئەتتۈرىدىغانلىقىنى ئەسكەرتتى.
غەززە سەھىيە مىنىستىرلىقىنىڭ ئاشكارىلىشىچە، ئىسرائىلىيە 2025-يىلى 10-ئۆكتەبىردە يولغا قويۇلغان ئۇرۇش توختىتىش كېلىشىمىگە قارىماي، تىنچلىق كېلىشىمىگە خىلاپلىق قىلىشنى داۋاملاشتۇرۇپ 1222 كىشىنى ئۆلتۈرگەن ۋە 4053 كىشىنى يارىلاندۇرغان.
مىنىستىرلىق يەنە، ئىسرائىلىيەنىڭ 2023-يىلى ئۆكتەبىردە غەززەگە قاراتقان قىرغىنچىلىق ئۇرۇشىنى باشلىغاندىن بۇيان، قازا قىلغانلار ئومۇمىي سانىنىڭ 73 مىڭ 349 غا، يارىلانغانلار سانىنىڭ بولسا 174 مىڭ 162 گە يەتكەنلىكىنى ئاشكارىلىدى.
ئىسرائىلىيەنىڭ ۋەھشىيانە ھەربىي ھۇجۇملىرى قەتئىلامدىن باشقا يەنە، غەززەدىكى ئاممىۋى ئۇل ئەسلىھەلەرنىڭمۇ %90 گە يېقىنىنى تەلتۆكۈس ۋەيران قىلغان بولۇپ، بىرلەشكەن دۆلەتلەر تەشكىلاتى قايتا قۇرۇش چىقىمىنىڭ تەخمىنەن 70 مىليارد دوللارغا يېتىدىغانلىقىنى مۆلچەرلىمەكتە.
