بىرلەشكەن دۆلەتلەر تەشكىلاتى غەززە رايونى ئۈچۈن ئامېرىكا، تۈركىيە، مىسىر ۋە قاتار تەرىپىدىن ئېلىپ بېرىلىۋاتقان ئۇرۇش توختىتىش سۆھبەتلىرى توغرىسىدا مۇناسىۋەتلىك بارلىق تەرەپلەر بىلەن داۋاملىق ئالاقىلىشىۋاتقانلىقىنى جاكارلىدى.
بىرلەشكەن دۆلەتلەر تەشكىلاتى باياناتچىسىنىڭ ياردەمچىسى فەرھان ھەق ئانادولۇ ئاگېنتلىقى مۇخبىرىنىڭ بۇ مەسىلىگە مۇناسىۋەتلىك سوئاللىرىغا جاۋاب بەردى.
فەرھان ھەق بىرلەشكەن دۆلەتلەر تەشكىلاتىنىڭ غەززەدە ھەرقانداق شەكىلدىكى ئۇرۇش توختىتىش تىرىشچانلىقىنى قوللايدىغانلىقىنى بىلدۈرۈپ، ئۇزۇن ۋاقىتتىن بۇيان ئۆزلىرىنىڭمۇ ئۇرۇش توختىتىش چاقىرىقى قىلىۋاتقانلىقىنى ئەسكەرتتى.
ئۇ غەززەدە ئۇرۇش توختىتىش، ئەسىرلەرنى قويۇپ بېرىش ۋە ئىنسانپەرۋەرلىك ياردەملىرىنى كۆپەيتىشكە ئېھتىياجلىق ئىكەنلىكلىرىنى قەيت قىلدى.
تىنچلىق سۆھبەتلىرى ھەققىدە بىرلەشكەن دۆلەتلەر تەشكىلاتىغا مەلۇمات بېرىلىپ-بېرىلمىگەنلىكى توغرىسىدىكى سوئالغا بولسا: «ھەرقايسى تەرەپلەر بىلەن داۋاملىق ئالاقىلىشىۋاتىمىز ۋە مەلۇمات ئېلىشقا تىرىشىۋاتىمىز» دەپ جاۋاب بەردى.
ئامېرىكا پىرېزىدېنتى جو بايدىن ئىلگىرى بەرگەن باياناتىدا: «ئالدىمىزدىكى كۈنلەردە ئامېرىكا، تۈركىيە، مىسىر، قاتار ۋە ئىسرائىلىيە بىلەن بىرلىكتە غەززەدە ئۇرۇش توختىتىش ئۈچۈن ھەرىكەتكە ئۆتىدۇ» دېگەنىدى.
