خىتاي باش مىنىستىر مۇئاۋىنى خې لىپېڭ شەنبە كۈنى ئەتىگەندە جەنۋەدە ئامېرىكا مالىيە مىنىستىرى سكوت بېسسېنت بىلەن كۆرۈشتى. خىتاي خەۋەر ئاگېنتلىقى ۋە سۆھبەتتىن خەۋەردار ئىككى كىشىنىڭ بىلدۈرۈشىچە، بۇ ئۇچرىشىش دۇنيا ئىقتىسادىنى تەۋرىتىۋەتكەن سودا ئۇرۇشىنى پەسەيتىش يولىدا ئېھتىياتچانلىق بىلەن تاشلانغان تۇنجى قەدەم دەپ قارالماقتا ئىكەن.
بېسسېنت ۋە ئامېرىكا سودا ۋەكىلى جەمىسون گىرىر ھەپتىلەردىن بۇيان كۈچىيىۋاتقان جىددىيچىلىكتىن كېيىن جەنۋەدە خې بىلەن كۆرۈشۈشنى پىلانلىغانىدى. بۇ جەرياندا، دۇنيادىكى ئەڭ چوڭ ئىككى ئىقتىسادىي گەۋدە ئوتتۇرىسىدىكى ئىمپورت بېجى %100 تىن كۆپ ئېشىپ كەتكەنىدى.
مەزكۇر سودا تالاش-تارتىشى، ئامېرىكا پىرېزىدېنتى دونالد ترامپنىڭ ئۆتكەن ئايدا نۇرغۇن دۆلەتلەرگە تاموژنا بېجى يۈرگۈزۈش قارارى بىلەن قوشۇلۇپ، تەمىنات زەنجىرلىرىنى بۇزدى، پۇل-مۇئامىلە بازارلىرىدا داۋالغۇش پەيدا قىلىپ، كەسكىن دۇنياۋى ئىقتىسادىي چېكىنىش [رېسېسسىيە] ئەندىشىسىنى كۈچەيتتى.
ئامېرىكا پىرېزىدېنتى دونالد ترامپ جۈمە كۈنى بايانات ئېلان قىلىپ، خىتاي ماللىرىغا يۈرگۈزۈلىدىغان %80 لىك تاموژنا بېجىنىڭ «مۇۋاپىق كۆرۈنۈۋاتقانلىقى»نى بىلدۈرگەنىدى. ترامپ بۇ باياناتى ئارقىلىق خىتاي ئىمپورتىغا يۈرگۈزۈلگەن %145 لىك باجنىڭ ئورنىغا تۇنجى قېتىم مەلۇم بىر نىسبەتنى ئوتتۇرىغا قويغانىدى.
ئورۇن مەخپىي
ئىككى تەرەپنىڭ سۆھبەت ئورنى مەخپىي تۇتۇلۇۋاتقان بولسىمۇ، جەنۋەدىكى بىر كىشى يېشىللىق بىلەن قاپلانغان شەھەر ئەتراپىدىكى بىر شەخسىي تۇرالغۇنىڭ ئالدىدا نۇرغۇن ساقچى ماشىنىسىنى كۆرگەنلىكىنى مەلۇم قىلدى.
خىتاي ۋەكىللەر ئۆمىكى جەنۋە كۆلى بويىدىكى بىر مېھمانخانىدا تۇرۇۋاتقان پەيتتە، قارا ئەينەكلىك مېرسىدىس مىنىبۇسلىرىنىڭ مېھمانخانىدىن ئايرىلىۋاتقانلىقى كۆرۈلدى. بۇنىڭدىن ئىلگىرى، بېسسېنت ۋە گىرىرنى ئۆز ئىچىگە ئالغان نۇرغۇن ئامېرىكالىق ئەمەلدار مېھمانخانىدىن چىقىۋاتقاندا، بوينىغا قىزىل گالستۇك تاقىغان ۋە ياقىلىرىغا ئامېرىكا بايرىقىنى قىستۇرغان ھالەتتە كۆرۈنگەنىدى. بېسسېنت مۇخبىرلار بىلەن سۆزلىشىشتىن ئۆزىنى قاچۇردى.
