ئىسرائىلىيە قورشاۋ ئاستىدىكى رايوندىكى ئەڭ ئاخىرقى تۇتقۇننىڭ جەسىتى قايتۇرۇۋېلىنغاندىن كېيىن، غەززە بىلەن مىسىر ئوتتۇرىسىدىكى رەفاھ چېگرا ئېغىزىنىڭ «چەكلىك ھالدا قايتا ئېچىلىشى» غا رۇخسەت قىلىدىغانلىقىنى ئۇقتۇردى.
بۇ ھەقتىكى بايانات، ئامېرىكا ۋەكىللىرىنىڭ غەززەگە ياردەم يەتكۈزۈش ئۈچۈن ناھايىتى زور ئەھمىيەتكە ئىگە بولغان مەزكۇر چېگرا ئېغىزىنى قايتا ئېچىش ئۈچۈن ئىسرائىلىيە دائىرىلىرىگە بېسىم قىلىۋاتقانلىقى ھەققىدىكى خەۋەرلەردىن كېيىن، يەكشەنبە كۈنى ئېلان قىلىندى.
رەفاھ چېگرا ئېغىزىنىڭ قايتا ئېچىلىشى ئۆكتەبىر ئېيىدا ئامېرىكا قوشما ئىشتاتلىرى پىرېزىدېنتى دونالد ترامپ تەرىپىدىن ئېلان قىلىنغان غەززە ئۇرۇش توختىتىش پىلانىنىڭ بىر قىسمىنى تەشكىل قىلىدۇ. مەزكۇر چېگرا ئېغىزى ئىسرائىلىيە ئارمىيەسى ئىرقىي قىرغىنچىلىق ئۇرۇشى جەريانىدا كونتروللۇقىنى قولغا كىرگۈزگەندىن بۇيان تاقاق ھالەتتە تۇرماقتا.
بېنيامىن نېتانياھۇنىڭ ئىشخانىسى ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، چېگرا ئېغىزىنىڭ قايتا ئېچىلىشىنىڭ «بارلىق تىرىك تۇتقۇنلارنىڭ قايتۇرۇلۇشى ۋە ھاماسنىڭ بارلىق ئۆلۈك تۇتقۇنلارنىڭ جەسەتلىرىنى تېپىپ قايتۇرۇپ بېرىش ئۈچۈن ئىمكانىيەتنىڭ بارىچە تىرىشچانلىق كۆرسىتىشى» گە باغلىق ئىكەنلىكىنى بىلدۈردى.
مەزكۇر ئىشخانا يەنە ئىسرائىلىيە ئارمىيەسىنىڭ «ئەڭ ئاخىرقى تۇتقۇن ران گۋىلىنىڭ جەسىتىنى تېپىش ۋە قايتۇرۇپ كېلىشكە كاپالەتلىك قىلىش ئۈچۈن توپلانغان بارلىق ئىستىخبارات مەلۇماتلىرىدىن پايدىلىنىپ، نۆۋەتتە نىشانلىق بىر ھەرىكەت ئېلىپ بېرىۋاتقانلىقىنى» ئەسكەرتتى ھەمدە بۇ ھەرىكەت تاماملانغاندىن كېيىن ۋە ئامېرىكا بىلەن ھاسىل قىلىنغان بىردەكلىككە ئاساسەن، ئىسرائىلىيەنىڭ رەفاھ چېگرا ئېغىزىنى ئاچىدىغانلىقىنى بىلدۈردى.
ئىسرائىلىيەنىڭ كېلىشىمگە خىلاپلىق قىلىش قىلىشلىرى
غەززە بىلەن مىسىرنى بىر-بىرىگە تۇتاشتۇرىدىغان رەفاھ چېگرا ئېغىزىنى 10-ئۆكتەبىردە يولغا قويۇلغان ئۇرۇش توختىتىش كېلىشىمىنىڭ بىرىنچى باسقۇچى دائىرىسىدە، ئۆكتەبىر ئېيىدا قايتا ئېچىش پىلانلانغان ئىدى، ئەمما ئىسرائىلىيە بۇ كېلىشىمگە ئەمەل قىلمىدى.
ئۇرۇش توختىتىش كېلىشىمى يولغا قويۇلغاندىن بۇيان، ئىسرائىلىيە ئارمىيەسى يۈزلەرچە قېتىم بۇ كېلىشىمگە خىلاپلىق قىلدى. سەھىيە مىنىستىرلىقىنىڭ مەلۇماتىغا ئاساسلانغاندا، ئىسرائىلىيە ئارمىيەسى كېلىشىمگە خىلاپلىق قىلىپ كەم دېگەندە 484 پەلەستىنلىكنى ئۆلتۈرگەن، 1321 كىشىنى يارىلاندۇرغان.
ئىسرائىلىيە قورشاۋ ئاستىدىكى رايونغا قاراتقان ئىرقىي قىرغىنچىلىق ئۇرۇشى داۋامىدا، كۆپىنچىسى ئاياللار ۋە بالىلاردىن تەشكىل تاپقان 71 مىڭدىن ئارتۇق پەلەستىنلىكنى ئۆلتۈردى، رايوننى خارابىلىككە ئايلاندۇردى ۋە پۈتكۈل ئاھالىنى ئۆي-ماكانلىرىدىن ئايرىلىپ قېلىشقا مەجبۇرلىدى.
